Hjordis

Frá Hvanneyri til Wageningen
Fjögurrra barna móðir í meistaranámi í umhverfisskipulagi

"Mig langaði út í nám og fór að skoða ýmsa möguleika og sækja um skóla. Ég frétti af íslenskum nemanda Hollandi, Hildu Björgu Þorgeirsdóttur, en hún hafði einnig lokið námi í umhverfisskipulagi við LbhÍ. Ég hafði samband við hana, skoðaði upplýsingar um skólann á netinu og svo í framhaldinu skrapp ég út til að skoða aðstæður eftir að hafa séð auglýstan opinn dag hjá skólanum," sagði Hjördís Sigurðardóttir, sem útskrifaðist með BS í umhverfisskipulagi LbhÍ vorið 2009. Hún stundar nú meistararnám við Wageningen University í Hollandi og stefnir á að útskrifast í haust. Hjördís er Sunnlendingur að uppruna, en hún er alin upp að að Kastalabrekku í Ásahreppi í Rangárvallasýslu. Hún lauk námi í matvælafræði frá HÍ og starfaði sem matvælafræðingur í áratug áður en hún söðlaði um og fór í umhverfisskipulag við LbhÍ.

Frá Hvanneyri til Wageningen
En hvað réð vali skóla ytra? Hjörtdís sagði að hún hefði þurft að vega og meta kosti og galla þess að læra í Oslo, Edenborg og Wageningen. "En ég hafði sótt um á öllum þessum stöðum eftir að umsóknarferli til Canada gekk ekki upp. Wageningen varð ofan á en það voru margir samverkandi þættir sem höfðu áhrif þar á. Kostnaðarlega virtist það álitlegt, sterk staða skólans og uppbygging námsins og gjörólíkt en að mörgu leiti heillandi umhverfi til að prófa að búa í. Svo má nefna að gott gengi hollenska fótboltalandsliðsins á þessum tíma hafði áhrif en flest börnin mín eru í boltanum, að því leyti lagðist það vel í þau að flytja til Hollands !"
- Hvernig tilfinning var það að setjast á hollenskan skólabekk?
"Fyrir mig var það í byrjun frekar erfitt, ég féll ekki beint að hollensku staðaltýpunni í svona námi. Nemendur hér er flestir mjög ungir og nánast enginn með fjölskyldu. En smám saman vandist ég því að sjá undrunarsvipinn á fólki þegar það komst að minni stöðu."

Meiri regla og agi í hollenskum skólum
- Í hverju liggur munurinn á milli skólakerfa hér heima og í Hollandi?
"Hið almenna skólakerfi í Hollandi miðar að því að nemendur séu nokkuð jafnir í getu í hverjum bekk þannig að hér hika menn ekki við að láta nemendur endurtaka árið til að ná fullnægjandi kröfum. Þannig að í grunnskóla og framhaldskóla geta nemendur verið á þremur aldursárum í sama bekk. Þetta gerir að sjálfsögðu starf kennarans léttara. En grunnskólastigi lýkur fyrir flesta um 12 ára aldur en þá tekur við framhaldskólastigið. Það skiptist í fjórar megin námsleiðir (sem svo skiptast enn frekar) eftir því hvaða stefnu nemendur ætlar að taka og getu þeirra. Á ungaaldri þurfa nemendur að svara spurningum um sjálfa sig og vita hvað þeir vilja í framtíðinni.
Að mínu mati ríkir í Hollandi miklu meiri agi og regla á öllu, t.d. er hér starfandi skólalögregla á grunn- og framhaldskólastigi. Nemendum ber að sýna kennara sínum virðingu og ávarpa hann með titli. Eftir framhaldskóla eru mismunandi námsleiðir í boði miðað við þá leið sem valinn var í framhaldskóla.

Samvinna milli námsleiða og faggreina
-Hvaða áherslur eru í þínu námi?
Ég er í námi sem kallast 'meistaranám í landslagsarkitektúr og skipulagi‘ með áherslu á skipulag'. Það er mjög kenningarfræðilegt, rannsóknarmiðað og frekar krefjandi. Postmodernísk hugmyndafræði er mikið til umfjöllunar og sjálfbær þróun á ýmsum sviðum. Mikil áhersla er lögð á samvinnu milli námsleiða og jafnvel milli faggreina. Mikil krafa er um að nemendur hafi undirbúið sig vel, taki afstöðu og að kennsla fari fram á gagnvirkan hátt.

Krakkarnir fengu góða uppfræðslu í hollensku
Hjördís er svo sannarlega ekki ein á báti. Hún á fjögur börn sem fluttu út með henni. Börnin eru á aldrinum 6 til 16 ára. "Þau hafa staðið sig eins og hetjur. Það var ekki auðvelt fyrir þau að setja sig inn í málið en allt er kennt á hollensku í þeirra námi. Þeim var boðið upp á mjög góða kennslu í málinu og það kom fljótt hjá þeim. Ég vil meina að reglan á hlutunum hafi verið þeim kjölfesta fyrstu vikurnar, jafnvel þó þau skildu ekkert vissu þau fljótlega hvernig allt fór fram. Yngri börnin eru í skóla sem er sérstaklega hannaður til að taka á móti erlendum nemendum þannig að þar er mjög alþjóðleg stemming þar sem um það bil helmingur nemenda koma frá tuttugu og fjórum mismunandi menningarheimum. Í framhaldskólanum þar sem eldri börnin stunda nám er boðið upp á sértæka hollenskukennslu fyrir erlenda nemendur sem einnig koma hvaðanæva að. Að þessu leiti eru skólarnir sem börnin eru í mjög frábrugðnir íslenskum skólum, fyrir utan meiri aga og reglu. Skólaárið er líka lengra og aðeins sex vikna sumarfrí en í staðinn eru tekin haust, vetrar og vorfrí.“
Deila