Aðsetur háskólanámsins er á Hvanneyri í Borgarfirði þar sem á undanförnum árum hefur risið myndarlegt háskólaþorp. Á Hvanneyri eru nemendagarðar með einstaklingsherbergjum og fjölskylduíbúðum. Íbúðir og herbergi eru tengd tölvuneti skólans. Leikskóli, grunnskóli og verslun eru á staðnum. Borgarnes er í 14 km fjarlægð og frá Hvanneyri til Reykjavíkur eru um 80 km. Í nágrenni Hvanneyrar eru fallegar göngu- og reiðleiðir og mikil náttúrufegurð. Við skólann er sérhæft bókasafn sem og rannsóknastofur og tilraunabú.

Yfirlit yfir lög og reglur LbhÍ um inntökuskilyrði nemenda til háskólanáms
Í lögum um búnaðarfræðslu (57/1999) 10. gr. segir: Nemendur sem hefja háskólanám í landbúnaði (BS nám) skulu hafa lokið stúdentsprófi, öðru sambærilegu námi eða búa yfir jafngildum þroska og þekkingu að mati stjórnar háskólans. Háskólaráð getur ákveðið sérstök viðbótarinntökuskilyrði fyrir hverja skilgreinda námsbraut háskólanámsins. Inntökuskilyrði í háskólanám í landbúnaði og námskröfur svari til þess sem krafist er í viðurkenndum háskólum á sambærilegu sviði erlendis.

Úr Starfsreglum Landbúnaðarháskóla Íslands- háskóladeildir

1.2 Inntökuskilyrði
Nemendur annarra háskóla geta einnig tekið hluta af námi sínu við Landbúnaðarháskólann enda sé kveðið á um það í sérstökum samningum milli stofnana. Til að hljóta innritun þarf nemandi að standa skil á skrásetningargjöldum samkvæmt lögum nr. 57/1999 um búnaðarfræðslu.

1.3 Mat á fyrra námi

1.3.1 Annað háskólanám
Nemendur sem áður hafa lokið sambærilegum námskeiðum háskólanáms og boðið er upp á í námi við Landbúnaðarháskóla Íslands, geta fengið námskeið metin til eininga. Kennslunefnd framkvæmir matið. Staðfest mat á fyrra námi skal liggja fyrir áður en kennsla hefst í viðkomandi námskeiði.

1.3.2 Fagleg vinna
Nemandi getur sótt um að fagvinna á hans námssviði verði metin í stað valgreina til allt að 6 samræmdra eininga (ECTS). Sem fagvinna reiknast hverskonar vinna sem telst auka hæfni eða innsýn nemandans til verkefna á hans fagsviði og stendur í a.m.k. 2 mánuði. Umsóknir um að fagvinna verði metin í stað valgreina skal að jafnaði berast áður en hún hefst og skal fylgja áætlun um í hverju vinna nemandans verði fólgin frá væntanlegum vinnuveitenda, ásamt áliti viðkomandi kennara. Nemandinn skal fyrir lokasamþykki kennslunefndar gera grein fyrir vinnunni með stuttri greinagerð. Í prófabók skulu einingar sem þannig er skilað skráður án námskeiðsnúmers en með heitinu Fagstörf og einkunn M (metið). Umsóknir um mat á faglegri vinnu samkv. þessari grein skal stíla til kennslunefndar.

---------------------

Framhaldsnám
Hægt er að stunda meistaranám til MS-gráðu (120 ETCS) á öllum meginfagsviðum skólans. Slíkt nám felst í sjálfstæðu rannsóknaverkefni (30-90 ECTS) og námskeiðum sem tekin eru við LbhÍ eða samstarfsháskóla ýmist hérlendis eða erlendis. Í búvísindum má einnig stunda starfsmiðað meistaranám með sérstakri áherslu á námskeið í búfjárrækt, jarðrækt og rekstrarfræðum.

Félagslíf   www.nlbh.is 
Við skólann starfar öflugt skólafélag sem stendur fyrir fjölbreyttu félagslífi, sjá nánar á heimasíðu þess. Alls konar klúbbastarfsemi og skemmtanahald setur svip sinn á lífið í skólanum. Í LbhÍ kynnist fólk með margvísleg lífsviðhorf og áhugamál. Þegar fólk býr, nemur og skemmtir sér á sama stað kynnist það betur og margir eignast vini fyrir lífstíð.