Sementsreiturinn á Akranesi. Umhverfisskipulag og arkitektúr.

Sameiginleg sýning nemenda í umhverfisskipulagi LbhÍ og arkitektúr við LHÍ var opnuð á dögunum á Akranesi. Kristín Pétursdóttir lektor LbhÍ og Karitas Möller arkitekt Tvíhorf arkitektum frá LHÍ áttu veg og vanda að sýningunni helguð sementsreitnum á Akranesi ásamt nemendum sínum. 

Námskeiðið, Arkitektúr og skipulag er kennt á þriðja ári á Umhverfisskipulagsbraut Landbúnaðarháskóla Íslands og byggist á því að nemendur kynnist hinum þverfaglegu þáttum sem unnið er með við gerð deili- og rammaskipulags. Nemendur vinna að einu raunverulegu verkefni yfir alla önnina og var verkefnið í ár hönnunartillaga fyrir Sementsreitinn á Akranesi.

Nálgun nemenda byggðist fyrst upp á því að finna staðrandann á svæðinu þar sem þau nýttu myndbandstöku til miðlunar. Þá var gerð skráning á legu svæðisins og greining þar sem meðal annars var rýnt í Aðalskipulagið. Úr því komu einskonar niðurstöður með áskorunum og tækifærum fyrir svæðið. Þriðji hlutinn var hugmyndavinna sem er rökstudd með fyrri þáttum. Áfram fengu svo nemendur hönnunarforsendur um það hversu marga fermetra af atvinnu- og íbúðarhúsnæði þau þyrftu að koma fyrir á svæðinu. Í síðasta hluta verkefnisins gerði svo hver nemandi hönnunartillögu fyrir svæðið byggt á fyrrnefndum þáttum. Hönnunartillagan var kynnt á veggspjöldum og með líkönum.

Nemendur í arkitektúr við LHÍ unnu einnig verkefni fyrir sama stað og var slegið upp samsýning á verkum þeirra í samstarfi við Akraneskaupstað.

Hér má sjá myndir frá opnun sýningarinnar sem opnaði 31.janúar sl. og stendur til 14. febrúar í rými í verslunarmiðstöðinni Smiðjuvöllum á Akranesi.

 

Þú ert að nota: brimir.rhi.hi.is