Landslagsarkitektúr

BS-nám í landslagsarkitektúr og skipulagsfræðum

Image

Þriggja ára BS - nám, 180 ECTS, staðarnám. Kennt á Hvanneyri.
BS-nám í landslagsarkitektúr og skipulagsfræðum. Gott samspil bygginga og opinna svæða auka á vellíðan og heilbrigði fólks. Jafnvægi milli náttúru, mannsins og hönnunar skal ávallt haft að leiðarljósi við skipulag lands. Í náminu er áhersla lögð á vistvæna nálgun og sjálfbærni með tilliti til sérstöðu Íslands.

Brautarstjóri er Samaneh Sadat Nickayin

Inntökuskilyrði

Image

Umsækjendur í Landslagsarkitektúr þurfa að skila rafrænni möppu/portfolio með umsókn. Markmiðið með möppunni er að nemandi endurspegli persónulega sýn á landslagsarkitektur. Úr þessu á að vera hægt að meta hæfileika nemanda til frumlegrar sköpunar og framsetningar á hugmyndum sínum.

Verkin í möppunni þurfa ekki að vera fullgerð og geta innihaldið hugmyndir, texta, skissur og teikningar og tæknilegar lausnir svo eitthvað sé nefnt. Nemandi skal hafa unnið að öllum verkunum og ef um hópastarf er að ræða skal það koma fram og það þarf að vera ljóst hvert hlutverk umsækjandans var.

Image

Áherslur í námi

Image

Áherslur á fyrsta ári
Inngangur að landslagsarkitektúr og skipulagsfræðum, garðsaga, formfræði, litafræði. Landslagsgreining, tölvustudd hönnun, landslags- byggingarfræði og vistfræði.

Áherslur á öðru ári
Útivistarsvæði, tré og runnar, jarðfræði, ljósmyndun, skissu- og hugmyndavinna. Einnig líkanagerð, skipulagsfræði og deiliskipulag.

Áherslur á þriðja ári
Mannvirki í landslagi, arkitektúr og skipulag. Umhverfi og lýðheilsa. Gerð BS-verkefnis.

Image
Image

Hvað segja nemendur

This image for Image Layouts addon

Á Hvanneyri fékk ég tækifæri til að blómstra í námi og félagslífi

„Ég flutti á Hvanneyri haustið 2013 og hóf nám mitt í landslagsarkitektúr sem er ein sú besta ákvörðun sem ég hef tekið. Frá því ég var lítil hef ég alltaf haft mikinn áhuga á arkitektúr og pælt mikið í umhverfi mínu. Landslagsarkitektúr sameinar áhuga minn um náttúruna og hið byggða umhverfi og gefur fagið mér verkfæri til að skapa sviðsmynd fyrir daglegt líf fólks. Í hönnunarvinnu sæki ég mikið í minningar úr æsku til dæmis þar sem ég var sem barn að vaða í tjörninni, leika uppí móa, hjóla í gegnum skóginn eða labba í hverfinu mínu. Allt það sem er úti er leikvöllurinn okkar, það er vettvangur og sviðsmynd fyrir lífið okkar og upplifanir. Því skiptir mig miklu máli að hanna aðgengilegt og skemmtilegt umhverfi fyrir alla aldurshópa, svo allir geti farið út að leika.“

Anna Kristín er úr Reykjavík en starfar í dag sem landslagsarkitekt hjá Teiknistofu Norðurlands á Akureyri þar sem hún kemur að fjölbreyttum hönnunar- og skipulagsverkefnum. Dæmi um verkefni sem Anna hefur komið að síðustu ár eru hönnun leikskólalóða og torgsvæða, skipulag kirkjugarða, miðsvæða og íbúðarbyggða. Síðasta árið hefur Anna tekið þátt í samkeppnum með þverfaglegu hönnunarteymi og átt vinningstillögur fyrir útsýnispall á Seyðisfirði og vistvænni íbúðarbyggð á Veðurstofureit í Reykjavík.

 
Skólinn er persónulegur og aðstaðan á vinnusal frábær en þar eyddi ég góðum tíma með bekkjarsystkinum mínum að vinna að krefjandi og skemmtilegum verkefnum. Nærumhverfi skólans er stórkostlegt og það að geta farið í göngutúr út í náttúrunni til að brjóta upp verkefnavinnuna var svo nærandi. Félagslífið á Hvanneyri er stórskemmtilegt en ég var mjög virk í nemendafélaginu, var skemmtanastjóri og tók þátt í að skipuleggja viðburði sem var frábær reynsla. Uppáhalds viðburðirnir mínir voru árshátíðin og leðjuboltinn, glamúr og drulla! Ég hugsa hlýtt til námsáranna minna og þeirra ógleymanlegu minninga sem ég á frá Hvanneyri.

Að loknu námi

Image

Störf að loknu BS- námi geta verið margvísleg, t.d. hjá opinberum aðilum, sveitarfélögum og ráðgjafafyrirtækjum, á teiknistofum landslagsarkitekta, skipulagsfræðinga, verkfræðinga og arkitekta, auk umsjónar með náttúruverndar- og útivistarsvæðum.

Með því að halda áfram í námi til meistaragráðu geta nemendur öðlast starfsréttindi sem landslagsarkitektar eða skipulagsfræðingar. Fólk sem hlotið hefur þessa gráðu vinnur að mótun umhverfis í þéttbýli og dreifbýli. Það gegnir mikilvægu hlutverki við að skipuleggja umhverfi okkar daglega lífs og þarf stöðugt að vera vakandi fyrir vistvænum og sjálfbærum lausnum í þéttbýli sem dreifbýli.

Landslagsarkitektar og skipulagsfræðingar vinna meðal annars við skipulagningu á þróun byggðar og landnýtingar. Þeir hanna opin svæði, garða og torg, skólalóðir, útvistar og ferðamannasvæði, kirkjugarða og vegastæði svo eitthvað sé nefnt. Þá má nefna að leitað er til landslagsarkitekta og skipulagsfræðinga þegar unnið að mati á umhverfisáætlunum og fleiri verkefnum sem tengjast skipulagsmálum og náttúrufræði.

Image
logo

Þekking á sviði sjálfbærrar nýtingar auðlinda, umhverfis, skipulags og matvælaframsleiðslu.

LBHÍ

Hvanneyri - 311 Borgarbyggð
Sími 433-5000
lbhi@lbhi.is
Kt. 411204-3590
Rafrænir reikningar

Starfsstöðvar

Flýtileiðir

Samfélagsmiðlar

Image