LBHIRannsóknirNám
  • Forsíða
  • Nám
  • Grunnnám
  • Diplóma í búvísindum með áherslu á dýraheilbrigði
Mynd sem tengist textanum

Diplóma í búvísindum með áherslu á dýraheilbrigði

Diplómanám LBHÍ opnar þér beina leið í dýralæknanám við hinn virta SGGW háskóla í Varsjá

Í haust býður Landbúnaðarháskóli Íslands (LbhÍ) upp á nýja námsleið í búvísindum með áherslu á dýraheilbrigði. Um er að ræða tveggja ára diplómanám sem hefur það meginmarkmið að undirbúa nemendur til starfa og áframhaldandi náms á sviði búvísinda og dýraheilbrigðisvísinda. LbhÍ og Lífvísindaháskólinn í Varsjá í Póllandi (SGGW) hafa gert samning um þessa námsleið. Þegar nemendur hafa lokið diplomanáminu við LbhÍ geta þeir sótt um inngöngu á þriðja ár í dýralæknisfræði við SGGW. Upplýsingar um það nám má finna á vefsíðu SGGW.

Diploma í búvísindum með áherslu á dýraheilbrigði

Sækja um

Inntökuskilyrði

Til að fá inngöngu í diplomanámið við LbhÍ, þarf umsækjandi að hafa lokið stúdentsprófi eða öðru lokaprófi á þriðja hæfniþrepi samkvæmt aðalnámskrá framhaldsskóla eða sambærilegu prófi frá erlendum skóla. Að baki stúdentsprófsins skulu vera a.m.k. 5 framhaldsskólaeiningar á þriðja hæfniþrepi í öllum eftirtalinna námsgreina: stærðfræði, eðlisfræði, efnafræði og líffræði. Jafnframt skulu vera 5 framhaldsskólaeiningar á þriðja hæfniþrepi til viðbótar í einhverjum þessara greina eða annarra raungreina.

Umsækjandi sem ekki hefur íslensku sem fyrsta tungumál þarf að sýna fram á að hafa þekkingu á íslensku á stigi B2 samkvæmt evrópska tungumálarammanum (CEFR).

Umsækjandi sem ekki hefur ensku sem fyrsta tungumál þarf að sýna fram á að hafa þekkingu á ensku á stigi B2 samkvæmt evrópska tungumálarammanum (CEFR) eða sambærilegt stig í TOEFL prófi.

Mynd sem tengist textanum

Skipulag náms 2025 - 2026

Námsskrá

Sótt er um námið í umsóknargátt á heimasíðu Landbúnaðarháskóla Íslands. Umsóknarfrestur er til 5. júní.

Umsókn um námið skal fylgja stutt kynningarbréf. Í bréfinu er gott að fram komi af hverju umsækjandi hefur áhuga á náminu, hvaða reynslu hann hefur af umgengni og störfum sem tengjast dýrum, og annað sem hann telur skipta máli fyrir umsóknina.

Hafi umsækjandi lokið öðru námi á háskólastigi má láta upplýsingar um það fylgja með umsókninni, telji umsækjandi það eiga við.

Við mat á umsóknum verður litið til einkunna á stúdentsprófi, annars náms sem umsækjandi hefur lokið og þess sem fram kemur í kynningarbréfi. Gert er ráð fyrir að mati á umsóknum verði lokið 19. júní. Þá verða þeir umsækjendur sem uppfylla inntökuskilyrði og raðast hæst, kallaðir í viðtal. Viðtölin munu fara fram á Hvanneyri dagana 22. – 26. júní.

Unnt verður að taka inn að hámarki 18 nemendur árlega í diplómanám við LBHÍ.

Tryggð pláss við SGGW eru 15 á ári fyrir nemendur sem uppfylla skilyrði og hafa lokið diplómanáminu frá LBHÍ.

Verði fjöldi umsækjenda sem standast inntökuskilyrði innan við tíu verður ekki hægt að hefja námið við LBHÍ.

Engin skólagjöld eru innheimt fyrir námið við LbhÍ, einungis árleg skráningargjöld. Nemendur sem fara áfram í dýralæknisfræði við SGGW greiða skólagjöld fyrir 5.-11. misseri, samkvæmt reglum þess skóla.

Þar sem um er að ræða nám sem krefst mikils vinnuframlags af hálfu nemenda og töluvert er um tíma sem nemendum er skylt að mæta í, mun LbhÍ kappkosta að tryggja nemendum húsnæði á Hvanneyri.