Búfræðinemar Landbúnaðarháskóla Íslands fóru í vikulanga starfsþjálfun í Þýskalandi – áhersla á sjálfbærni, tækni og alþjóðlega tengslamyndun

Þátttaka búfræðinema Landbúnaðarháskóla Íslands í Erasmus+ hefur tekið stökk fram á við síðustu ár og náð nýju hámarki á námsárinu 2025–2026. Nemendur í búfræðinámi sækja sér alþjóðlega reynslu í mun stærri hópum en áður, og fjölgunin í verkefnum er orðin svo afgerandi að hún markar nýtt tímabil í alþjóðavæðingu búfræðináms á Íslandi.

Rétt fyrir páska fóru 30 búfræðinemar í skipulagt starfsnám til DEULA Nienburg GmbH, einnar fremstu evrópsku starfsþjálfunarmiðstöðvar í landbúnaðartækni, dagana 23.–27. mars 2026. Ferðin er hluti af Erasmus+ áætluninni og styður við markmið skólans um að efla verklega færni, stafræna getu og alþjóðlega tengslamyndun nemenda.

Stór skref í alþjóðavæðingu búfræðináms
Þessi ferð er sú metnaðarfyllsta á framhaldsskólastigi LBHÍ til þessa, bæði hvað varðar fjölda nemenda og umfang. Hún endurspeglar þann mikla áhuga sem búfræðinemar sýna á að efla sig í erlendu starfsumhverfi, tileinka sér nýjar aðferðir og taka þátt í þróun landbúnaðar framtíðar.

Markmið ferðarinnar voru m.a. að:

• efla tæknilega og verklega hæfni,
• byggja upp alþjóðlega sýn og tengslanet ásamt menningarlæsi,
• undirbúa nemendur fyrir síbreytilegan, stafrænan og sjálfvirkan landbúnað,
• tengja íslenskar og evrópskar aðferðir með raunhæfum hætti.

Menningarlæsi og hópefli í fyrirrúmi
Auk tæknilegrar þjálfunar var mikil áhersla lögð á alþjóðlega hæfni, hópefli og menningarlæsi, sem skipta lykilmáli fyrir nemendur sem ætla sér að starfa í nútímalegum og sífellt alþjóðlegri landbúnaði.

Hópurinn tók m.a. þátt í:

• sameiginlegum verknámstímum með þýskum jafnöldrum,
• fræðslu um menningarmun og verkmenningarhætti,

• Fræðsluferðir tengdri landbúnaði og menningu með öðrum nemendum í verknámi.

Þessi þáttur styrkir tengsl, bætir samskiptahæfni og eykur skilning á fjölbreyttum starfsháttum innan Evrópu – færni sem hefur bein áhrif á framtíðarstarf nemenda.

Námið – frá sáningu til sjálfvirkra véla
Dagskrá vikunnar var þétt og fjölbreytt og veitti nemendum einstaka innsýn í nútímalegan landbúnað, þar á meðal:

• nýjustu aðferðir í sáningu, jarðvinnslu og jarðvegsbúskap,

• þjálfun í dráttarvélum og tækjakosti með sjálfvirkum og stafrænum kerfum,

• áburðargjöf og illgresisstjórnun með skynjurum, myndavélum og AI‑tækni,

• fóðuröflun og framleiðsluaðferðir,

• samanburð á íslenskum og þýskum landbúnaðarháttum og þróun í greininni,

• vettvangsheimsóknir á fjárbýli, verktakabýli og fyrirtæki í framvarðasveit landbúnaðarnýsköpunar.

Nemendur unnu í stórum verkstæðum, tækjahúsum og úti á akri ― alls óháð veðri ― sem veitir þeim raunverulega, stöðuga verklega þjálfun.

„Reynsla sem skilar sér beint inn í íslenskan landbúnað“
Starfsnámið skilar sér beint til íslensks landbúnaðar. Nemendur öðlast dýpri sýn á sjálfbærni, nákvæmnisbúskap og stafræna þróun og koma til baka með aukna reynslu og þekkingu sem gagnast bæði í áframhaldandi námi og störfum framtíðarbænda Íslands.

Nánari upplýsingar veitir Eva Hlín Alfreðsdóttir, [email protected].

Myndir: Helgi Eyleifur Þorvaldsson, Unnsteinn Snorri Snorrason & Eva Hlín Alfreðsdóttir