UNIgreen háskólanetið, sem Landbúnaðarháskóli Íslands er hluti af, kynnir nýsköpunarkeppnina UNIgreen SURES Challenge Lab sem er kjörinn vettvangur fyrir nemendur sem vilja þróa hugmyndir sínar áfram.

Nýtt í ár er að þátttakendur geta nýtt sama verkefni til þátttöku í tveimur alþjóðlegum keppnum samtímis. Auk UNIgreen SURES Challenge Lab gefst tækifæri til að taka þátt í Bio-based Innovation Student Challenge – Europe (BISC-E), evrópskri keppni sem leggur áherslu á lífhagkerfi og sjálfbærar lausnir.

Hvað er verið að leita að?

Leitað er að nýsköpunarhugmyndum sem tengjast meðal annars:

• sjálfbærum landbúnaði
• líftækni og lífhagkerfi
• matvælum og matvælaöryggi
• loftslagslausnum og hringrásarhagkerfi

Hugmyndir geta verið á hvaða stigi sem er. Mikilvægast er að þær sýni nýnæmi, byggi á traustum vísindalegum eða tæknilegum grunni og hafi raunhæfa möguleika til frekari þróunar.

Tækifæri í gegnum BISC-E

Verkefni sem uppfylla skilyrði geta einnig tekið þátt í BISC-E keppninni. Þar er lögð áhersla á lausnir sem byggja á lífrænum hráefnum eða ferlum og stuðla að sjálfbærni, minni losun og aukinni hringrás í hagkerfinu. Verkefnin eru unnin í þverfaglegum teymum og miða að því að tengja saman fræði, atvinnulíf og samfélag.

Hverjir geta tekið þátt?

• Nemendur á BSc, MSc eða PhD stigi
• Nýútskrifaðir innan eins árs frá útskrift
• Nemendur í búfræði

Hvað færðu út úr þátttöku?

Með þátttöku færðu tækifæri til að þróa eigin hugmynd áfram, vinna í teymi og fá faglega endurgjöf. Þú færð þjálfun í frumkvöðlastarfi, verkefnastjórnun og kynningum, auk þess að byggja upp tengslanet bæði innanlands og á alþjóðavettvangi. Þátttaka gefur einnig einingar í námi.

Ferlið

Umsóknarfrestur er til 30. apríl 2026.

Valin teymi taka þátt í vinnustofu 18. maí þar sem unnið er markvisst að þróun hugmynda undir handleiðslu sérfræðinga í nýsköpun. Daginn eftir, 19. maí, kynna teymin verkefni sín fyrir dómnefnd sem velur tvö bestu liðin áfram og veitir verðlaun fyrir þátttökuna.

Þessi teymi fá tækifæri til að taka þátt í lokakeppni UNIgreen í París í október 2026 og, eftir því sem við á, einnig í evrópskri lokakeppni BISC-E.

Umsóknir

Sækja þarf um með því að fylla út umsóknareyðublað fyrir 30. apríl 2026 hér: UNIgreen Innovation Challenge - Application Form – Fill in form

Tengiliður fyrir keppnina er Jóhanna Gísladóttir, [email protected]

Dómnefnd skipa:

Dr. Alexander Schepsky, framkvæmdastjóri Gleipnis nýsköpunar- og þróunarseturs á Vesturlandi sem er samstarfsverkefni á Vesturlandi sem snýr að nýsköpun og þróun tækifæra á sviði landbúnaðar, matvælaframleiðslu, sjálfbærni og loftslagsmála

Áshildur Bragadóttir, endurmenntunar- og nýsköpunarstjóri Landbúnaðarháskóla Íslands

Dr. Jón Grétar Sigurjónsson, kennsluforseti Landbúnaðarháskóla Íslands

Taktu skrefið og nýttu tækifærið til að þróa hugmynd sem getur haft raunveruleg áhrif – bæði á Íslandi og á evrópskum vettvangi.