Haustið 2025 hófst nýtt meistaranám í sjálfbærum landbúnaði og byggðaþróun, sem er samstarfsverkefni Landbúnaðarháskóla Íslands og Háskóla Íslands og var styrkt af Háskóla-, iðnaðar- og nýsköpunarráðuneytinu (HVIN). Nú þegar fyrsta skólaárið er að líða undir lok er ljóst að mikil þörf var fyrir slíka námsleið og að samstarfið milli skólanna hefur reynst afar öflugt.

Námið er byggt á þverfaglegri nálgun þar sem landbúnaðarvísindi, umhverfisvísindi, nýsköpun, félagsvísindi og byggðaþróun eru samþætt. Markmiðið er að námið skili út sérfræðingum í samfélagið sem geti leyst raunverulegar áskoranir í landbúnaði og fæðukerfum framtíðar hér heima og alþjóðlega, með sjálfbærni að leiðarljósi. Námið er kennt á ensku

Aðdragandi námsins var umfangsmikill – meðal annars var haldin fjölmenn vinnustofa sumarið 2024 í samstarfi við Ráðgjafamiðstöð landbúnaðarins, þar sem 43 fulltrúar úr ólíkum stofnunum og fyrirtækjum komu saman og lögðu sitt af mörkum við mótun námsins.

Í fyrsta námsárganginum hefur þegar skapast tenging við atvinnulíf og opinberar stofnanir, ekki síst í gegnum vettvangsferðir og heimsóknir nemenda til ýmissa aðila og stofnana. Nemendur hafa sinnt fjölbreyttum verkefnum sem snúa meðal annars að sjálfbærri framleiðslu, nýsköpun, fæðuöryggi, loftslagsmálum, byggðaþróun og hringrásarhagkerfi. Þá hefur samkennsla og þekkingarflæði á milli skólanna reynst mikil styrking fyrir námið og kennarar beggja háskóla koma að bæði kennslu og leiðsögn.

Lagt er upp með að við stofnun námsleiðarinnar sé verið að mæta brýnni þekkingarþörf er varðar samspil landbúnaðar, fæðuöryggis og búsetu í dreifbýli. Nám í sjálfbærum landbúnaði er því orðinn mikilvægur vettvangur fyrir þau sem vilja taka þátt í að þróa íslenskan landbúnað, fæðukerfi og hinar dreifðu byggðir með framtíðina að leiðarljósi.

Nánari upplýsingar um námið má meðal annars finna á hér.

Opið er fyrir umsóknir í námið og rennur frestur út 15. apríl næstkomandi. Við hvetjum öll til þess að fara inn á heimasíðuna www.haskolanam.is til þess að kynna sér námið betur, en hægt er að innrita sig í það í gegnum annaðhvort umhverfis- og auðlindafræði við Háskóla Íslands eða búvísindi við Landbúnaðarháskóla Íslands.

Nánari upplýsingar veita Jóhanna Gísladóttir við LBHÍ, [email protected] eða Jón Geir Pétursson við HÍ, [email protected].