Undanfarnar vikur hefur 15 manna hópur meistaranema og kennara frá LBHÍ, HÍ og HA tekið þátt í Erasmus+ starfsnámi í Kólumbíu.

Alejandro Salazar Villegas dósent hjá LBHÍ ásamt Adriana Sanchez hjá del Rosario háskólanum og María Elena Gutiérrez-Lagoueyte hjá EIA háskólanum skipulögðu námsferðina Tundra meets the Páramo. Þá komu Isabel C. Barrio prófessorí LBHÍog Ingibjörg Svala Jónsdóttir prófessor hjá HÍ einnig að skipulagningu og kennslu.

Markmið námskeiðsins var að bera saman áhrif loftslagsbreytinga annars vegar á vistkerfi á hálendi í Kólumbíu og hinsvegar á norðlægara vistkerfi Íslands. Nemendur unnu að lífeðlisfræðilegum mælingum á plöntum, beit, jarðvegsferlum og líffræðilegri fjölbreytni í Chingaza þjóðgarðinum og Nevados þjóðgarðinum, undir leiðsögn vísindamanna frá del Rosario og EIA háskólunum.

Frá Íslandi voru 9 nemendur frá LBHÍ og þrír kennarar, einn nemi frá HÍ og einn kennari og einn nemi frá HA. Frá Del Rosario háskólanum í Bogóta einn kennari og fjórir nemendur á eigin vegum og frá EIA háskólanum í Medellín tveir kennarar og 1 samstarfsaðili á eigin vegum auk tveggja nemenda á eigin vegum. Maylin Gonzalez, frá Humboldt Institute, hélt gestafyrirlestur og The Botanical garden í Bogotá bauð hópnum í fræðsluheimsókn.

-- Fréttin hefur verið uppfærð.