Fimm nemendur frá Landbúnaðarháskóla Íslands tóku nýverið þátt í UNIgreen SURES Innovation Challenge Grand Final, sem fram fór hjá SupBiotech í París dagana 26.–30. október 2026. Þar komu saman 15 lið frá 8 háskólum innan UNIgreen Alliance-samstarfsins til að kynna nýstárlegar hugmyndir á sviði sjálfbærs landbúnaðar, líftækni, umhverfisvísinda og matvælaframleiðslu.

SURES (Start-Ups for Research) Programme er ætlað að efla frumkvöðlahugsun og styðja við þróun nýsköpunarverkefna og sprotafyrirtækja. Nemendur og nýútskrifaðir einstaklingar fá þar tækifæri til að þróa hugmyndir sínar og takast á við raunveruleg samfélags- og umhverfisleg viðfangsefni.

Tvö lið frá Landbúnaðarháskóla Íslands unnu sér þátttökurétt í París eftir að hafa staðið upp úr í íslensku undankeppninni fyrr á þessu ári. Fyrra liðið skipuðu Prince Addai og Salahuddin Noori, sem kynntu verkefnið ArcticBioLoop: AI-Powered Bio-Digital Soil Intelligence System for Climate-Smart Agriculture. Verkefnið sameinar gervigreind, jarðvegsskynjara, lífkol og basaltbundnar jarðvegslausnir til að styðja við loftslagsvænan landbúnað á norðurslóðum. Markmiðið er að hjálpa bændum að taka upplýstar ákvarðanir byggðar á gögnum, auka uppskeruöryggi og styrkja sjálfbærni matvælaframleiðslu.

Seinna liðið skipuðu Heiðrún Hrund Sigurðardóttir, Sigríður Ósk Jónsdóttir og Svala Valborg Fannarsdóttir, sem kynntu verkefnið Grænir Hagar. Hugmyndin byggir á því að tengja saman sauðfjárrækt, landgræðslu og kolefnisjöfnun með áskriftarleið þar sem einstaklingar og fyrirtæki geta styrkt bændur með því að „eiga“ kind. Verkefnið miðar að því að bæta beitarstýringu, stuðla að endurheimt vistkerfa og skapa bændum nýjar tekjuleiðir á sama tíma og það styrkir tengsl almennings við íslenskan landbúnað.

Þótt íslensku liðin hafi ekki hlotið verðlaun í keppninni reyndist þátttakan afar dýrmæt reynsla. Nemendurnir fengu tækifæri til að kynna verkefni sín á alþjóðlegum vettvangi fyrir dómnefnd, taka þátt í vinnustofum, fyrirlestrum og umræðum með frumkvöðlum og sérfræðingum, auk þess að mynda tengsl við nemendur og rannsakendur frá öðrum háskólum innan bandalagsins. Þátttakendur heimsóttu einnig Genopole, eitt fremsta nýsköpunarumhverfi Evrópu á sviði líftækni.

Þátttaka í úrslitakeppninni undirstrikar þann metnað og þá sköpunarkrafta sem búa í nemendum Landbúnaðarháskóla Íslands. Háskólinn óskar Prince Addai, Salahuddin Noori, Heiðrún Hrund Sigurðardóttir, Sigríður Ósk Jónsdóttir og Svala Valborg Fannarsdóttir til hamingju með árangurinn og þakkar þeim fyrir að vera framúrskarandi fulltrúar skólans á þessum alþjóðlega vettvangi.