Grænni skógar



Námskeiðaraðirnar Grænni skógar I og Grænni skógar II eru skógræktarnám ætlað fróðleiksfúsum skógarbændum og áhugasömum skógræktendum sem vilja auka þekkingu sína og ná betri árangri í skógrækt. Námið er metið til eininga á framhaldsskólastigi og lýkur með sérstakri viðurkenningu frá LbhÍ. Jafnframt er námið sniðið að þörfum vinnandi fólks. Allir sem áhuga hafa geta hafið nám í Grænni skógum I en æskilegt er að fólk hafi lokið Grænni skógum I eða sambærilegu námi áður en það skráir sig í Grænni skóga II.

Grænni skógar I er þriggja ára nám eins og Grænni skógar II. Að jafnaði eru haldin tvö til þrjú helgarnámskeið á Grænni skógum I, en tvö helgarnámskeið á Grænni skógum II á hverri önn og skiptast þau niður í fyrirlestra og verklega tíma. Vettvangsferðir eru stór hluti af kennslunni. Hver þátttakandi tekur u.þ.b. 15 námskeið á Grænni skógum I og u.þ.b. 12 námskeið á Grænni skógum II. Námskeiðin eru haldin á mismunandi stöðum. Þau eru sérsniðin að sérstöðu landshlutanna, sem gefur náminu aukið gildi og sérhæfingu.

LbhÍ sér um framkvæmd námsins í samstarfi við landshlutabundnu skógræktarverkefnin, Landssamtök skógareigenda, félög skógarbænda í viðkomandi landsfjórðungi, Skógrækt ríkisins og Landgræðslu ríkisins.

Hver námskeiðaröð er bundin við ákveðinn landsfjórðung og er miðað við um 25 manna hópa. Helgarnámskeið er frá kl. 16 -19 á föstudögum og kl. 9 - 16 næsta dag.