Fræ til framtíðar

Landbúnaðarháskóli Íslands er samstarfsaðili í verkefninu Fræ til framtíðar sem ýtt var úr vör af frumkvöðlum á vestfjörðum þeim Gunnari Ólafssyni og Arnhildi Lilý Karlsdóttur og styrkt af Matarauði Íslands. Fræ til framtíðar snýst um að kenna grunnskólanemendum á vatnsræktarkerfi sem þau útbúa sjálf og rækta sér svo til matar í skólastofunni. 

Verkefnið hófst í janúar 2020 og eru nú fimm skólar á Vestfjörðum sem taka þátt. Skólarnir sem um ræðir eru grunnskólarnir í Bolungarvík, Þingeyri, Ísafirði, Patreksfirði og Tálknafirði. Verkefnið tekur til nemenda 3. bekkjar í skólunum en sumir smærri samstarfsskólanna sameina bekki og því bæði eitt grunnstig eitt miðstig sem gefur nokkra aldursbreidd. Alls eru tæplega 100 nemendur sem nú taka þátt í verkefninu.

„Við viljum taka þátt í að auka meðvitund barna og ungmenna um sjálfbærni, matarsóun og mataröryggi. Við erum að ala upp klára krakka, þau munu leiða heiminn eftir okkar dag og miklu fyrr“ segir Arnhildur Lilý um verkefnið. 

Nemendurnir læra ekki aðeins að þekkja og vinna með plöntur heldur er takmarkið að þeir öðlist betri meðvitund um matvæli, framleiðslu og neyslu, þ.e. hvaðan matur kemur og hvað þarf til að geta ræktað sér til matar. Einnig er snert á hugtökum á borð við sjálfbærni, matarsóun og fæðuöryggi. Nemendur læra að sá fræjum og sjá líf kvikna, huga að spírunum og næra, og síðar sinna plöntum í vatnsræktunarkerfi sem hver bekkur hefur í skólastofunni sinni.

Vatnsræktunarkerfin eru einföld kerfi sem unnin hafa verið í samstarfi við FabLab á Ísafirði. Þau eru tveggja metra há með rými fyrir 35 plöntur í láréttum rörum. Nemendur fá í hendurnar tól og tæki til að stunda vísindalegar rannsóknir undir leiðsögn umsjónarkennara og starfsmanna Fræ til framtíðar. Meðal þess sem nemendur mæla er EC leiðni og PH gildi í næringarvatninu sem veitt er á plönturnar í kerfinu, ásamt því að fylgjast með og mæla vöxt plantnanna. Kerfið má ekki aðeins nýta til að stunda t.d. samanburðarrannsóknir á ólíkum skilyrðum heldur má nýta kerfið í heild sinni á þverfaglegan hátt í við kennslu, en það býður uppá tengingu við flestar námsgreinar og skemmtilega nálgun á námsefnið. Allt námsefni og teikningar er aðgengilegt og til þess fallið að sækja og nýta heimafyrir.

„Fræ til framtíðar er kynslóðaverkefni, ekki átak“ er haft eftir Gunnari.

Vefsíða verkefnisins fraetilframtidar.is er hægt að skoða hér en er enn í vinnslu. Einnig er hægt að fylgjast með verkefninu á Facebook og Instargram.

Þú ert að nota: brimir.rhi.hi.is