Fræ til framtíðar samstarf

Fræ til framtíðar hóf í janúar 2020 verkefni sem snýr að því að kenna nemendum 3. bekkjar ýmislegt sem tengist ræktun. Ekki aðeins læra nemendurnir að þekkja og vinna með plöntur heldur er takmarkið að þeir öðlist betri meðvitund um matvæli, framleiðslu og neyslu, þ.e. hvaðan matur kemur og hvað þarf til að geta ræktað sér til matar. Einnig er snert á hugtökum á borð við sjálfbærni, matarsóun og fæðuöryggi.

Nemendur læra að sá fræjum og sjá líf kvikna, huga að spírunum og næra, og síðar sinna plöntum í vatnsræktunarkerfi sem hver bekkur hefur í skólastofunni sinni. Vatnsræktunarkerfin eru einföld kerfi sem unnin hafa verið í samstarfi við FabLab á Ísafirði. Þau eru tveggja metra há með rými fyrir 35 plöntur í láréttum rörum. Nemendur fá í hendurnar tól og tæki til að stunda vísindalegar rannsóknir undir leiðsögn umsjónarkennara og starfsmanna Fræ til framtíðar.

Meðal þess sem nemendur mæla er EC leiðni og PH gildi í næringarvatninu sem veitt er á plönturnar í kerfinu, ásamt því að fylgjast með og mæla vöxt plantnanna. Kerfið má ekki aðeins nýta til að stunda t.d. samanburðarrannsóknir á ólíkum skilyrðum heldur má nýta kerfið í heild sinni á þverfaglegan hátt í við kennslu, en það býður uppá tengingu við flestar námsgreinar og skemmtilega nálgun á námsefnið.

Allt námsefni og teikningar er aðgengilegt og til þess fallið að sækja og nýta heimafyrir. Verkefnið er styrkt af Matarauði Íslands og unnið í samstarfi við Landbúnaðarháskólann.

Heimasíða verkefnisins

 

Þú ert að nota: brimir.rhi.hi.is