Landgræðsluskólinn

Landgræðsluskólinn varð formlega hluti af neti UNESCO þann 1. janúar 2020 þegar skólinn varð hluti af GRÓ Þekkingarmiðstöð þróunarsamvinnu. GRÓ starfar undir merkjum Mennta-, vísinda- og menningarmálastofnunar Sameinuðu þjóðanna, UNESCO, og er fyrsta þverfaglega miðstöðin sem það gerir.

Skólinn er samstarfsverkefni utanríkisráðuneytisins, Landbúnaðarháskóla Íslands og Landgræðslunnar og er markmið hans að þjálfa sérfræðinga frá þróunarlöndum sem glíma við land- og jarðvegseyðingu og neikvæð áhrif loftslagsbreytinga. Landgræðsluskólinn hóf störf sem tilraunaverkefni árið 2007 og starfaði á árunum 2010 til 2019 undir hatti Háskóla Sameinuðu þjóðanna. Frá upphafi hafa yfir 130 manns frá 13 löndum útskrifast frá sex mánaða námi skólans á Íslandi og svipaður fjöldi hefur lokið stuttum námskeiðum á vegum skólans í þróunarlöndum.

Nemar í sex mánaða námi Landgræðsluskólans koma frá þróunarlöndum sem standa frammi fyrir landeyðingu og neikvæðum afleiðingum hennar á efnahag, samfélög og umhverfi. Þau eru öll starfsmenn samstarfsstofnana Landgræðsluskólans í heimalöndum sínum þar sem þau vinna að landgræðslu, umhverfisstjórnun og/eða sjálfbærri landnýtingu. Samstarfsstofnanir Landgræðsluskólans eru einkum ráðuneyti, umhverfisstofnanir og héraðsstjórnir, en einnig háskólar og aðrar rannsóknastofnanir. Mestur hluti kennslunnar fer fram í húsakynnum Landbúnaðarháskóla Íslands á Keldnaholti en nemarnir dvelja einnig drjúgan hluta sumarsins í höfuðstöðvum Landgræðslu ríkisins í Gunnarsholti á Rangárvöllum. Náminu líkur með kynningu á rannsóknaverkefnum sem nemarnir vinna að á meðan þeir dvelja hér á landi.

Landgræðsluskólinn stendur einnig fyrir stuttum námskeiðum í þróunarlöndunum. Námskeiðin eru þróuð og haldin í samstarfi við samstarfsstofnanir skólans í viðkomandi löndum. Í þessum námskeiðum er leiðarljósið, líkt og í sex mánaða náminu, að aukin landgæði og heil vistkerfi stuðli að ávinningi fyrir samfélög og atvinnulíf, sem styður við velferð einstaklinga og samfélaga til framtíðar.

Rekstur skólans er að mestu leyti fjármagnaður af utanríkisráðuneytinu og er hluti af þróunarsamvinnu Íslands sem er ein grunnstoðin í utanríkisstefnu Íslands. 

Vefsíða Landgræðsluskólans (enska) 

Þú ert að nota: brimir.rhi.hi.is