Rit um ástand lands og hrun íslenskra vistkerfa

Út er komið rit sem nefnist „Ástand lands og hrun íslenskra vistkerfa“ eftir Ólaf Arnalds, prófessor við Landbúnaðarháskóla Íslands. Ritið er nr. 130 í ritröð LbhÍ.

Slæmt ástand lands og hrun vistkerfa eru á meðal mikilvægustu umhverfismála samtímans sem og endurheimt vistkerfa. Í „Ástandsritinu“ er fjallað um hvaða mælikvarðar eru notaðir til að meta ástand lands byggt á alþjóðlegum aðferðum. Aðferðirnar eru studdar fjölda ljósmynda af landi í mismunandi ástandi. Mikilvægt er að fjalla um ástand lands og landhnignun í víðu samhengi, m.a. með skilningi á undirliggjandi hvötum, tegund landnýtingar og ferlum hnignunar, sem síðan leiða til tiltekins ástands lands.

Fjallað er um landbúnaðarstyrki sem dæmi um afgerandi undirliggjandi hvata landhnignunar, m.a. hér á íslandi. Þróun í viðhorfum til mats á ástands lands er skýrð, með áherslu á beitarnýtingu. Þá fá svokölluð „heilkenni breyttra grunnviðmiða“ („samdaunasýki“) nokkurt rúm: hvernig hver kynslóð tekur slæmu ástandi lands sem sjálfsögðum hlut án þess að gera sér grein fyrir hvernig ástandið hefur breyst - með afar alvarlegum afleiðingum fyrir vistkerfi landsins. Hrun íslenskra vistkerfa fær sérstaka umfjöllun og heimildir um breytingarnar eru raktar. Mismunandi áhrif landnýtingar á vistkerfi landsins síðasta árþúsundið eru m.a. skýrð á grunni þátta er móta þanþol vistkerfa. 

Ritið er ætlað þeim sem vilja efla skilning sinn á náttúru landsins, jafnt almenningi, skólafólki sem fagfólki sem ber ábyrgð á velferð landsins. Á næstunni er ennfremur að vænta rits um mold, loftslag og landnýtingu í sömu ritröð eftir Ólaf Arnalds og Jón Guðmundsson.

Ritið má nálgast í heild sinni hér

--
tengt efni
--

Ritröð LbhÍ

Þú ert að nota: brimir.rhi.hi.is