Undirritaður hefur verið fimm ára samstarfssamningur milli Lands og skógar, Landbúnaðarháskóla Íslands og Háskólans á Bifröst um að efla rannsóknir, menntun og nýsköpun á sviði skógræktar og sjálfbærrar nýtingar skógarauðlinda á Íslandi.
Markmið samstarfsins er að þróa nýjar aðferðir við umhirðu og endurnýjun skóga, auka nýtingu og markaðssetningu skógafurða og styðja við nýsköpun í tengslum við sjálfbæra nýtingu skógarauðlinda. Áhersla verður lögð á að nýta Skorradal sem tilraunasvæði fyrir rannsóknir, þróun og kennslu.
Í samstarfinu felst meðal annars:
- Rannsóknir á sviði skógræktar, skógarhöggs og nýtingar skógafurða.
- Samstarf um námskeið og námsbrautir tengdar skógrækt, nýtingu og markaðssetningu skógarafurða.
- Þróun nýrra aðferða í skógarnýtingu og byggja upp þjónustu skógarverktaka.
- Vöruþróun á afurðum úr íslenskum skógum.
- Þróun viðskiptaáætlana fyrir nýjar vörur.
Verkefnahópur með fulltrúum allra aðila fer fyrir samstarfinu. Verkefnin verða fjármögnuð með styrkjum úr innlendum og erlendum sjóðum sem og með samstarfi við einkaaðila í tengdum atvinnugreinum.
Árangur verður metinn með margvíslegum mælikvörðum, svo sem fjölda samstarfsverkefna, þátttöku nemenda og kennara, lokaverkefnum sem byggð verða á samstarfinu, fjármögnun, birtingu vísindagreina og þróun nýrrar vöru og þjónustu.
Samningurinn er undirritaður til fimm ára með möguleika á framlengingu eða endurnýjun að þeim tíma loknum.
